Мобильді нұсқа Нашар көретіндерге арналған нұсқа
20.02.2018

Қызметтер

Жалпы ақпарат

Қызылқоға аудандық мәслихаты туралы

 

10 желтоқсан 1993 жылғы Қазақстан Республикасының «Қазақстан Республикасының жергілікті өкілді және атқарушы органдары туралы» Заңына сәйкес 1994 жылдың наурыз айында мәслихат депутаттарының сайлауы өтіп, нәтижесінде Қазақстан Республикасында бірінші рет облыстық, қалалық, аудандық мәслихаттар құрылды.

Мәслихат - облыстың, республикалық маңызы бар қаланың және астананың немесе ауданның (облыстық маңызы бар қаланың) халқы сайлайтын, халықтың еркін білдіретін және Қазақстан Республикасының заңнамасына сәйкес оны іске асыру үшін қажетті шараларды айқындайтын және олардың жүзеге асырылуын бақылайтын сайланбалы, жергілікті өкілді орган.

Қызылқоға аудандық мәслихаты - депутаттар жиналысы 1994 жылдың 18 наурызында жұмысын бастады, оның құрамына 15 депутат сайланды. Алғашқы мәслихат хатшысы болып Сабыров Аманқос сайланды.

1999 жылдың 3 қарашасында өкілді орган – Қызылқоға аудандық мәслихаты құрылып, ІІ шақырылымда 12 депутат сайланды. Бұл шақырылымда мәслихат хатшысы болып Әубәкіров Хамит сайланды.

Үшінші шақырылған мәслихат 2003-2007 жылдарда жұмыс жасады. Мәслихат хатшысы болып Бейсқали Толқын Ермекқызы сайланды.

Бұл кезеңде аудандық мәслихат бойынша 110 шешім қабылданса, 15 депутаттық сауалдар бойынша шешім қабылданып, жүзеге асырылды.

2007-2012 жылдар аралығында төртінші шақырылған аудандық мәслихатқа 12 депутат сайланды. Мәслихат хатшысы Бейсқали Толқын Ермекқызы болды.

Мәслихаттың ІІ, ІІІ, ІV шақырылымдарында тексеру комиссиясының төрағалары болып депутаттар Бақтыбай Әжіғалиев (марқұм), Нұрлан Бекешов, Талғат Әбдуалиев (марқұм) сайланды.

2012-2016 жылдарда жұмыс жасаған бесінші шақырылған аудандық мәслихат құрамында 12 депутат болды, олар 3 тұрақты комиссияда жұмыс жасады. Мәслихат хатшысы Бейсқали Толқын, ал тұрақты комиссияларды депутаттар Қ.Қоданов, А.Аққайнанов, О.Жанықұлов басқарды. Осы шақырылымда аудандық мәслихат сессияларында 207 шешім, 18 депутаттық сауалдар бойынша шешімдер қабылданып, жүзеге асырылды.

2016 жылдың 29 наурызында VI шақырылған аудандық мәслихат өз жұмысын бастады. Мәслихат хатшысы болып Бейсқали Толқын Ермекқызы қайтадан сайланды. Мәслихат құрамында 3 тұрақты комиссия жұмыс жасайды. Бюджет, қаржы, экономика, кәсіпкерлікті дамыту, аграрлық мәселелер және экология жөніндегі тұрақты комиссияға депутат А.Баймұратова, әлеуметтік мәселелер, гендерлік саясат, жастар мен үкіметтік емес ұйымдармен байланыс жөніндегі тұрақты комиссияға депутат А.Есенжанов, заңдылықты сақтау, депутаттық этика және құқық қорғау мәселелері жөніндегі тұрақты комиссияға депутат А.Алтыбаев жетекшілік жасады.

Мәслихат аппараты депутаттар жұмысын ұйымдастыру мақсатында қызмет етеді. Қазіргі уақытта аппарат басшысы лауазымында Құмаров Қанат Темірұлы қызмет жасап келеді.

 


Мақаланың шыққан күні:: 20.06.2016 16:17
Парақтағы соңғы өзгерістер:: 29.01.2018 17:07